កម្មវិធីវិទ្យុ
ព័ត៌មានពេលព្រឹក៖ ៣០ កញ្ញា ២០២១
ព័ត៌មានអំពីកម្ពុជាមាន អ្នកកាសែតក្នុងខេត្តកោះកុងម្នាក់រងការចោទប្រកាន់ពីបទបរិហារកេរ្តិ៍ ក្រោយធ្វើសេចក្តីរាយការណ៍ពីវិវាទដីធ្លី។ រដ្ឋសភាអាមេរិកអនុម័តសេចក្តីស្នើច្បាប់ស្តីពីលទ្ធិប្រជាធិបតេយ្យកម្ពុជាសារជាថ្មី ក្រោមរដ្ឋបាលលោកប្រធានាធិបតី Biden។ រីឯព័ត៌មានអន្តរជាតិវិញមាន បេសកជនសហរដ្ឋអាមេរិកថា កិច្ចព្រមព្រៀង AUKUS មិនគំរាមកំហែងស្ថិរភាពតំបន់ឥណ្ឌូប៉ាស៊ីហ្វិកនោះទេ។ ដែនកោះតៃវ៉ាន់ ស្នើរឹតបន្តឹងច្បាប់ដើម្បីការពារការលួចបច្ចេកវិទ្យាពីប្រទេសចិនដីគោក។ សេដ្ឋកិច្ចវៀតណាម បានរួញតូចនៅក្នុងត្រីមាសទី៣។ តម្លៃរូបិយប័ណ្ណរបស់មីយ៉ាន់ម៉ា បានធ្លាក់ថ្លៃ៦០% ស្របពេលដែលសេដ្ឋកិច្ចរបស់ប្រទេសនេះ ធ្លាក់ចុះចាប់តាំងពីក្រោយរដ្ឋប្រហារយោធាមក។ កងទ័ពប្រទេសអង់គ្លេស នឹងចែកចាយប្រេងឥន្ធនៈដើម្បីបន្ធូរបន្ថយវិបត្តិការផ្គត់ផ្គង់ប្រេង៕
ព័ត៌មានពេលរាត្រី៖ ៣០ កញ្ញា ២០២១
ព័ត៌មានអំពីកម្ពុជាមាន តុលាការខេត្តកោះកុង កាត់ទោសអ្នកកាសែតម្នាក់ឲ្យជាប់ពន្ធនាគារ១ឆ្នាំ ពីបទញុះញង់។ នគរបាលចិនចែកព័ត៌មានសម្ងាត់និងផ្ដល់បច្ចេកវិទ្យាតាមដានជាមួយកម្ពុជា ហើយជួយសង់ទីបញ្ជាការកណ្ដាលនគរបាលជាតិ។ នៅក្នុងកម្មវិធី Hello VOA ថ្ងៃនេះ មានកិច្ចពិភាក្សាអំពី«បញ្ហាសិទ្ធិជនជាតិដើមខ្មែរកម្ពុជាក្រោមត្រូវរំលោភបំពាននាំឲ្យមានអន្តរាគមន៍ពីក្រុមមន្ត្រីអ.ស.ប.»។ រីឯព័ត៌មានអន្តរជាតិវិញមានដូចជា សភាស.រ.អ.ប្រុងប្រៀបអនុម័តថវិកាបញ្ចៀសការបិទផ្នែកខ្លះនៃរដ្ឋាភិបាលស.រ.អ.។ សមាជិកសភាសហរដ្ឋអាមេរិក ជជែកដេញដោលអំពីសង្គ្រាមដែលឧត្តមសេនីយកំពូលអាមេរិកថា «ជាសង្គ្រាមដែលមិនអាចឈ្នះបាន»។ ព្រឹទ្ធសភាខាងគណបក្សប្រជាធិបតេយ្យអំពាវនាវឲ្យលោក Biden គាំទ្រការតាំងទីលំនៅរបស់ជនជាតិអាហ្វហ្គានីស្ថាននិងជនជាតិផ្សេងទៀត។ ពួកតាលីបង់និងចិន តវ៉ាការរំលោភដែនអាកាសអាហ្វហ្គានីស្ថានដោយអាមេរិក។ កូរ៉េខាងជើង ច្រានចោលការអំពាវនាវរបស់អាមេរិកឱ្យមានកិច្ចចរចា។ ពលរដ្ឋមីយ៉ាន់ម៉ា ប្រយុទ្ធដើម្បីមានអ៊ីនធឺណិត និងព័ត៌មានផ្សេងទៀត៕
