Россия, Москва: Қуролланган шахслар ҳужуми оқибатида ўнлаб одам қурбон бўлган (video)
Москвадаги Crocus City Hall санъат саройига қуролли шахслар ҳужум қилиши оқибатида камида 137 киши қурбон бўлган.
Россия президенти Путин ўз мурожаатида 24 мартни миллий мотам куни деб эълон этган. Ҳужумчилардан тўрт нафари қўлга олингани ва жангарилар Украина томон қочишга уринганини урғулаган.
"Улар ким бўлишидан ва ким уларни йўлга солиб турганидан қатъий назар, биз уларни топамиз, террорчилар ортида турганларни жазолаймиз", деб айтган Владимир Путин.
Америка Қўшма Штатларига кўра, "Исломий давлат" гуруҳи бу ҳужумни уюштирганини даъво қилган. Аммо Россия мулозимлари ҳозирга қадар муносабат билдиришгани йўқ.
Пикник гуруҳининг концертига йиғилганлар талотўпда қочаётгани ва залга ўт кетгани бир неча видеоларда тарқамоқда. Видео тасвирларда ўқ ва портлаш овозлари янграйди.
Украина мулозимлари бу ҳужумга Киевнинг мутлақо алоқаси йўқлигини айтишган.
Америка Қўшма Штатларининг Москвадаги элчихонаси бу ҳужумдан "даҳшатга тушганини" айтган ва россияликларга ўз таъзиясини изҳор этган.
Америкаликларни 48 соат давомида катта йиғинларда иштирок этмасликка чақирган.
Икки ҳафта аввал эса Америка ўз фуқароларини огоҳлантирган ва " Москвадаги катта йиғинлар, жумладан концертларга экстремистлар ҳужумлари эҳтимоли" ҳақидаги хабарларни ўрганаётганини билдирганди.
Тожикистон ўз фуқароларининг бу терактда иштирок этгани ҳақида Россиядан расман маълумот олмаган
Бу ҳақда Тожикистон Ташқи ишлар вазирлиги ўз вебсайтида баёнот жойлаган.
"Таъкидлаб ўтамизки, Тожикистон томони Россия ҳукуматидан ҳозир тарқатилаётган фейк хабарлар - гўё Тожикистон фуқаролари иштироки ҳақида ҳеч бир маълумот олгани йўқ. Биз Россия давлати идораларининг маълумотларни эътибор қилишга чақирамиз. Шуни назардан қочирмаслик керакки, текширилмаган ва ишончсиз хабарларни тарқатиш Тожикистон ташқарисида бўлган ватандошларимизга зарар етказиши мумкин".
Би-би-си манбасига кўра, "ҳужумчиларнинг икки нафари Крокус Сити Ҳоллда ўлдирилган". Улардан бирининг ҳужжати Би-би-си Рус хизматида бор.
Би-би-сида мавжуд ҳужжат нусхасидан унинг Тожикистон фуқароси паспорти экани англашилади.
Би-би-сида яна бир ҳужжат нусхаси бор ва у Шамсиддин Фаридунийга тегишли бўлиб, бу паспорт ҳам Тожикистонда олинган.
Путин сайлов ғалабасини Кремлда нишонлади, Россияга ҳужумлар кўпайди
Россия президенти Владимир Путин ўтган дам олиш кунлари сайловда ғалаба қозонгач, Москвадаги дабдабали маросимга ўзининг машҳур тарафдорларини тўплади.