កម្មវិធីវិទ្យុ
ព័ត៌មានពេលព្រឹក៖ ២៥ សីហា ២០២១
ព័ត៌មានអំពីកម្ពុជាមានដូចជា អធិការស្រុកអូររាំងឪត្រូវផ្អាកភារកិច្ចជាបណ្តោះអាសន្ន ជុំវិញករណីអំពើពុករលួយ។ លោក សម រង្ស៊ី ប្រកាសសម្របសម្រួលជម្លោះផ្ទៃក្នុងបក្ស ដែលរួមរឹតដោយការវាយប្រហារគ្នា។ រីឯព័ត៌មានអន្តរជាតិវិញមានដូចជា ចិនប្រតិកម្មនឹងអ្នកស្រី Harrisដែលថា ចិនបង្ខិតបង្ខំបំភិតបំភ័យនៅសមុទ្រចិនខាងត្បូង។ ខណៈមានការភ័យខ្លាចនិងការរិៈគន់ ក្រុមតាលីបង់ចង់បានការទទួលស្គាល់ជាអន្តរជាតិ។ អ្នករស់រានជីវិតពីការរញ្ជួយដីក្នុងប្រទេសហៃទីបារម្ភពីអនាគតកូនចៅរបស់គេ។ ប្រធានាធិបតីទុយនីស៊ីពន្យារពេលការផ្អាកសភា។ អតីតប្រធានាធិបតីប្រទេសឆាដស្លាប់ ក្នុងអំឡុងពេលជាប់ទោសអស់មួយជីវិតពីបទឧក្រិដ្ឋកម្មសង្គ្រាម។ វីដេអូបែកធ្លាយបង្ហាញពីស្ថានភាពដ៏អាក្រក់ក្នុងពន្ធនាគារ Evin នៅអ៊ីរ៉ង់។ អង្គការ UNHCR និយាយថាជនជាតិអាហ្វហ្គានីស្ថានគួរត្រូវបានការពារ និងមិនត្រូវបំភ្លេចចោលទេ៕
ព័ត៌មានពេលរាត្រី៖ ២៥ សីហា ២០២១
ព័ត៌មានអំពីកម្ពុជាមានដូចជា ជំនន់ទឹកភ្លៀងនៅក្រុងព្រះសីហនុសម្លាប់មនុស្សម្នាក់ និងខូចខាតទ្រព្យសម្បត្តិរបស់ពលរដ្ឋ។ មន្រ្តីកម្ពុជា និងអ្នកជំនាញអ.ស.ប តទល់គ្នាជុំវិញក្តីបារម្ភអំពីការកាត់ទោសលោក រ៉ុង ឈុន។ មជ្ឈមណ្ឌលឯកសារកម្ពុជាបង្ហាញសៀវភៅ«នរោត្តមសីហនុ និងជូ អេនឡាយ» សរសេរដោយអតីតទីប្រឹក្សារបស់សម្តេចសីហនុ។ រដ្ឋាភិបាលកម្ពុជាដាក់ផែនការចាក់វ៉ាក់សាំងដូសជំរុញឲ្យរួចរាល់ត្រឹមពាក់កណ្តាលឆ្នាំក្រោយ។ រីឯព័ត៌មានអន្តរជាតិវិញមានដូចជា អនុប្រធានាធិបតីអាមេរិកអ្នកស្រី Harris ផ្តល់ការគាំទ្រដល់វៀតណាមទប់ទល់ចិននៅសមុទ្រចិនខាងត្បូង។ សហរដ្ឋអាមេរិកនឹងបញ្ចប់ការហោះហើរជម្លៀសពលរដ្ឋពីអាហ្វហ្គានីស្ថានឱ្យបានមុនថ្ងៃផុតកំណត់ទី៣១ ខែសីហា។ សមាជិកសភាអាមេរិកទៅទស្សនាអាកាសយានដ្ឋានក្រុងកាប៊ុល ចំពេលមានការខិតខំជម្លៀស។ រដ្ឋសភាអាមេរិកអនុម័តច្បាប់ស្តីពីសុវត្ថិភាពសង្គមរបស់លោក Biden។ អ៊ីស្រាអែលនឹងជំរុញជំហរតឹងរ៉ឹងចំពោះអ៊ីរ៉ង់ក្នុងកិច្ចពិភាក្សាជាមួយអាមេរិក៕
