TV
ཀུན་གླེང་། ༢༠༢༢ ལོའི་ཟླ་༨ ཚེས་༥
ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་༧གོང་ས་མཆོག་ལ་ལ་དྭགས་སུ་དཔལ་རྔམ་གཟེངས་རྟགས་འབུལ་བཞེས་མཛད་པ་དང་། རྒྱ་ནག་གིས་ཐེ་ཝན་ཉེ་འཁོར་དུ་དམག་སྦྱོང་དང་ས་གནས་སྲིད་གཞུང་དག་གི་བློ་འཚབ། རྡོ་རྗེ་བཀྲ་ཤིས་ཀྱི་ཁྲིམས་རྩོད་པའི་གསལ་བཤད། ཨུ་རུ་སུ་དང་ཨེ་སི་རལ་གྱི་འབྲེལ་ལམ། འཇིགས་སྐུལ་ལ་གདོང་ལེན་སོགས་ཡོད། ཐེངས་འདིའི་ཆབ་སྲིད་བཙོན་པ་ངོ་སྤྲོད་ཀྱི་ལེ་ཚན་ནང་ཆབ་སྲིད་བཙོན་ཟུར་དགེ་འདུན་རིན་ཆེན་ལགས་ཀྱིས་ཁོང་གི་ཆབ་སྲིད་བཙོན་རོགས་རིག་འཛིན་ཆོས་ཉིད་དམ་པ་དང། བློ་བཟང་ཡོན་ཏན་ལགས་དམ་པ་གཉིས་ཀྱི་སྐོར་ལ་ངོ་སྤྲོད་གནང་ཡོད།། ཀུན་གླེང་ལས་རིམ་དུ་རྡོ་རྗེ་ཚེ་བརྟན་ལགས་ཀྱིས་༢༠༢༢་ལོའི་༧གོང་ས་ཏཱ་ལའི་བླ་མའི་དགའ་ལྡན་ཕོ་བྲང་གི་དགེ་རྩའི་སློབ་ཡོན་དང་དབུས་བོད་མིའི་སྒྲིག་འཛུགས་ཀྱི་ཤེས་རིག་ལྷན་ཁང་གི་སློབ་ཡོན་སྤྲོད་ཕྱོགས་བཅས་ལ་དགའ་ལྡན་ཕོ་བྲང་གི་དགེ་རྩའི་དྲུང་ཆེ་སེ་ལྦོ་བསྟན་འཛིན་དམ་ཆོས་དང་ཤེས་རིག་ལྷན་ཁང་གི་མཐོ་སློབ་སློབ་ཡོན་ཚན་པའི་འགན་འཛིན་བསོད་ནམས་བཟང་མོ། པེན་སིལ་ཝེ་ཎི་ཡ་མངའ་སྡེའི་སློབ་གྲྭ་ཆེན་མོའི་འབུམ་རམས་སློབ་གཉེར་བ་བཀྲ་ཤིས་རྣམ་རྒྱལ་གསུམ་གདན་འདྲེན་ཞུས་ནས་བགྲོ་གླེང་ཞུ་རྒྱུ་ཡིན་པས་དུས་ཐོག་གསན་གཟིགས་གནང་བར་ཞུ།།