កម្មវិធីវិទ្យុ
ព័ត៌មានពេលព្រឹក៖ ១២ មករា ២០២១
ព័ត៌មានសំខាន់ៗអំពីកម្ពុជាមានដូចជា បវេសនកាលថ្មីនៅកម្ពុជាចាប់ផ្ដើម ខណៈទិន្នន័យបឋមបង្ហាញថាសិស្សធ្លាក់ចុះជិត២ម៉ឺននាក់។ រីឯព័ត៌មានអន្តរជាតិវិញមានដូចជា ប្រទេសថៃប្រឈមនឹងវិបត្តិទ្វេក្នុងឆ្នាំ២០២០ គឺជំងឺរាតត្បាតនិងបញ្ហានយោបាយ។ កិច្ចសន្ទនា VOA អំពីដំណើរទស្សនកិច្ចរបស់រដ្ឋមន្ត្រីការបរទេសសហរដ្ឋអាមេរិកមកកាន់ទីស្នាក់ការ VOA ក្នុងរដ្ឋធានីវ៉ាស៊ីនតោន។ លោក Biden នឹងតែងតាំងអតីតមន្ត្រីការទូតជើងចាស់លោក William Burns ឲ្យធ្វើជានាយកទីភ្នាក់ងារ CIA។ អ្នកតវ៉ានៅហុងកុងមានប្រតិកម្មតបទៅនឹងការប្រៀបធៀបរបស់ចិនរវាងព្រឹត្តិការណ៍នៅវិមានសភាអាមេរិកជាមួយនឹងព្រឹត្តិការណ៍នៅសភាហុងកុង។ ប្រមុខការទូតចិនធ្វើទស្សនកិច្ចនៅមីយ៉ាន់ម៉ាក្នុងដំណើរទស្សនកិច្ចទៅកាន់តំបន់អាស៊ីអាគ្នេយ៍។ ក្រុមហ៊ុន Pfizer និងក្រុមហ៊ុន BioNTechនឹងបង្កើនការផលិតវ៉ាក់សាំងកូវីដ១៩ ឲ្យបាន ៥០% បន្ថែមទៀត។ សហរដ្ឋអាមេរិកនឹងដាក់ក្រុមឧទ្ទាម Houthis ក្នុងប្រទេសយេម៉ែនក្នុងបញ្ជីអង្គការភេរវកម្ម។ ឥណ្ឌានឹងបើកយុទ្ធនាការចាក់វ៉ាក់សាំងកូវីដ១៩ នៅទូទាំងប្រទេសនៅថ្ងៃសៅរ៍ខាងមុខ។ លោកស្រី Melania Trump ភរិយាលោក Trump សម្តែង «ការខកចិត្តនិងបាក់ទឹកចិត្ត» ចំពោះហេតុការណ៍វាយប្រហារវិមានសភា៕
ព័ត៌មានពេលរាត្រី៖ ១២ មករា ២០២១
ព័ត៌មានអំពីកម្ពុជាមានដូចជា ការនិវត្តមកកម្ពុជារបស់លោកស្រី មូរ សុខហួរ មានសញ្ញាមិនជាក់លាក់។ តុលាការភ្នំពេញថាសវនាការលោក កឹម សុខា មិនមែនជាអាទិភាព ដោយសារលោកនៅក្រៅឃុំ។ តុលាការខេត្តព្រះសីហនុឃុំខ្លួនតំណាងសហគមន៍ដីធ្លីម្នាក់ ខណៈអ្នកផ្សេងទៀតភ័យខ្លាចការចាប់ខ្លួន។ អតីតស្រ្តីជនភៀសខ្លួនខ្មែរទី១ស្បថចូលកាន់តំណែងតំណាងរាស្ត្រថ្នាក់រដ្ឋនៅរដ្ឋម៉ាស្សាឈូសេត។ ព័ត៌មានអន្តរជាតិមានដូចជា រដ្ឋមន្ត្រីការបរទេសអាមេរិកលោក Pompeo បំពេញទស្សនកិច្ចនៅការិយាល័យ VOA និងបានសរសើរ VOA។ រដ្ឋសភាសហរដ្ឋអាមេរិកចាត់វិធានការដើម្បីព្យាយាមដកលោកប្រធានាធិបតី Trump ពីតំណែង។ សន្តិសុខត្រូវបានរឹតបន្តឹង ខណ:ដែលអភិបាលរដ្ឋធានី Washington មិនលើកទឹកចិត្តឲ្យពលរដ្ឋចូលរួមពិធីស្បថចូលកាន់តំណែងលោក Biden។ ជិត៣ភាគ៤នៃអ្នកបោះឆ្នោតអាមេរិកជឿថា លទ្ធិប្រជាធិបតេយ្យអាមេរិកកំពុងរងការគំរាមកំហែង។ អង្គការសុខភាពពិភពលោក (WHO) ថាខ្លួនមិនមែនចង់ទម្លាក់កំហុសទេ ស្របពេលដែលខ្លួនទៅស៊ើបអង្កេតប្រភពនៃជំងឺកូវីដ១៩នៅប្រទេសចិន។ មហាក្សត្រម៉ាឡេស៊ីប្រកាសដាក់ប្រទេសក្នុងគ្រាអាសន្ននៅពេលការឆ្លងកូវីដ១៩ កើនឡើងខ្លាំង និងព័ត៌មានសំខាន់ៗមួយចំនួនទៀត៕