កម្មវិធីវិទ្យុ
ព័ត៌មានពេលព្រឹក៖ ១៩ មករា ២០២១
ព័ត៌មានអំពីកម្ពុជាមានដូចជា តុលាការបញ្ចប់ការស៊ើបអង្កេតលើព្រះអង្គ លួន សុវ៉ាត ពីបទ«រំលោភសេពសន្ថវៈ» និង«បរិហារកេរ្តិ៍ជាសាធារណៈ»។ ពលរដ្ឋមួយចំនួនស្ទាក់ស្ទើរចាក់វ៉ាក់សាំងកូវីដរបស់ចិន ខណៈលោក ហ៊ុន សែន ប្រាប់ឲ្យទុកចិត្ត។ ចំណែកឯព័ត៌មានអន្តរជាតិវិញមានដូចជា ពិធីសច្ចាប្រណិធានចូលកាន់តំណែងរបស់លោក Biden នឹងខុសពីពិធីមុនៗកន្លងមក។ លោក Biden បង្ហាញរបៀបវារៈថ្ងៃដំបូងរបស់លោកសម្រាប់ពេលចូលកាន់តំណែងជាប្រធានាធិបតីសហរដ្ឋអាមេរិក។ លោក Fauci ថា ផែនការរបស់លោក Biden ក្នុងការចាក់វ៉ាក់សាំងកូវីដ១៩ ឲ្យបាន ១០០ លាននាក់ក្នុង ១០០ ថ្ងៃដំបូង គឺអាចទៅរួច។ ប្រធានអង្គការសុខភាពពិភពលោកព្រមានពីភាពមិនស្មើគ្នានៅក្នុងការចែកចាយវ៉ាក់សាំងកូវីដ១៩ ជាសកល។ ការិយាល័យសិទ្ធិមនុស្សអង្គការសហប្រជាជាតិទាមទារឲ្យដោះលែងមេដឹកនាំគណបក្សប្រឆាំងរុស្ស៊ីជាបន្ទាន់។ ប៉ូលិសអាល្លឺម៉ង់បង្កើនកិច្ចសហប្រតិបត្តិការឆ្លងព្រំដែនប្រឆាំងនឹងការរត់ពន្ធមនុស្សពីវៀតណាម៕
ព័ត៌មានពេលរាត្រី៖ ១៩ មករា ២០២១
ព័ត៌មានសំខាន់ៗអំពីកម្ពុជាមានដូចជា សហរដ្ឋអាមេរិកផ្តល់ជំនួយ៤២ម៉ឺនដុល្លារ ដើម្បីអភិរក្សប្រាសាទបុរាណកម្ពុជា។ ភាពតានតឹងក្នុងគ្រួសារពេលមានវិបត្តិជំងឺកូវីដ នាំឲ្យមានការព្រួយបារម្ភពីកំណើនអំពើហិង្សាលើស្រ្តី។ សកម្មជនសហគមន៍ខ្មែរអាមេរិកាំងនៅទីក្រុងឡុងប៊ិច ចាប់ផ្តើមចូលពាក់ព័ន្ធក្នុងឆាកនយោបាយថ្នាក់មូលដ្ឋាន។ ព័ត៌មានអន្តរជាតិមានដូចជា លោកBiden និងអ្នកស្រី Harris នឹងគោរពវិញ្ញាណក្ខន្ធអ្នកដែលស្លាប់ដោយសារកូវីដ១៩ ក្នុងសហរដ្ឋអាមេរិក នៅមុនពិធីស្បថចូលកាន់តំណែង។ លោក Biden នឹងមិនធ្វើតាមផែនការរបស់លោក Trumpដើម្បីលុបចោលការរឹតត្បិតការធ្វើដំណើររបស់ពលរដ្ឋអឺរ៉ុបដោយសារជំងឺកូវីដ១៩។ លោក Biden នឹងស្នើមធ្យោបាយចូលសញ្ជាតិរយៈពេល៨ឆ្នាំ សម្រាប់ជនអន្តោប្រវេសន៍គ្មានក្រដាសស្នាម១១លាននាក់។ មេបក្សប្រឆាំងរុស្ស៊ីលោក Navalny អំពាវនាវឲ្យមានការតវ៉ាប្រឆាំងនៅតាមផ្លូវ បន្ទាប់ពីលោកត្រូវជាប់ពន្ធនាគារ។ ជនអន្តោប្រវេសន៍តក់ស្លុត រន្ធត់ចិត្ត ហើយខ្លះស្ទើរស្រក់ទឹកភ្នែក ពេលឃើញកុបកម្មនៅវិមានសភាអាមេរិក។ រដ្ឋមន្ត្រីការបរទេសអាមេរិកជំរុញឲ្យបន្តគោលនយោបាយរបស់លោក Trump ចំពោះប្រទេសចិន និងព័ត៌មានផ្សេងៗទៀត៕
