កម្មវិធីវិទ្យុ
ព័ត៌មានពេលព្រឹក៖ ២៧ មករា ២០២១
ព័ត៌មានអំពីកម្ពុជាមាន ពលករចំណាកស្រុកកម្ពុជានៅថៃប្រឈមនឹងហានិភ័យឆ្លងជំងឺកូវីដ១៩ និងការធ្លាក់ចុះចំណូល។ រីឯព័ត៌មានអន្តរជាតិវិញមានដូចជា លោក Biden ជំរុញសភាឲ្យចាត់វិធានការបន្ទាន់លើកញ្ចប់ជំនួយថ្មីសម្រាប់វិបត្តិកូវីដ១៩។ រុស្ស៊ីនិងសហរដ្ឋអាមេរិកកំពុងចរចាគ្នាអំពីការបន្តសន្ធិសញ្ញានុយក្លេអ៊ែរ New START។ យោធាមីយ៉ាន់ម៉ាព្រមានថា ខ្លួនប្រហែលជាចាត់វិធានការទាក់ទិននឹងការតវ៉ារឿងលទ្ធផលបោះឆ្នោត។ សមាជជ្រើសរើសថ្នាក់ដឹកនាំថ្មីរបស់គណបក្សកុម្មុយនីស្ដវៀតណាមបានចាប់ផ្ដើមកាលពីថ្ងៃអង្គារ។ អ៊ីរ៉ង់ជួបពិភាក្សាជាមួយក្រុមតាលីបង់ដើម្បីពិនិត្យមើលដំណើរការសន្ដិភាពអាហ្វហ្គានីស្ថាន។ ខណៈមានភាពតានតឹង មានការទាមទារឲ្យបណ្តាញសារព័ត៌មានមានទំនាក់ទំនងថ្មីជាមួយរដ្ឋបាលអាមេរិកថ្មី។ ពលរដ្ឋអ៊ីរ៉ាក់ដែលពិការដោយសង្គ្រាមរដ្ឋឥស្លាមយកកីឡាបាល់ទះធ្វើជាអាជីព៕
ព័ត៌មានពេលរាត្រី៖ ២៧ មករា ២០២១
ព័ត៌មានសំខាន់ៗអំពីកម្ពុជាមានដូចជា មន្ត្រីកម្ពុជាសន្យាពន្លឿនការចាក់វ៉ាក់សាំងកូវីដ១៩ ដែលត្រូវការ២០លានដូស។ មន្ត្រីឧទ្យានុរក្សខ្លះប្រថុយគ្រោះថ្នាក់ការពារធនធានធម្មជាតិដែលនៅសេសសល់។ សិស្សរៀនចប់ទី១២ ចង់បានការតម្រង់ទិស ដើម្បីពួកគេអាចជ្រើសរើសជំនាញសិក្សាត្រឹមត្រូវ។ រីឯព័ត៌មានអន្តរជាតិវិញមានដូចជា ការឆ្លងជំងឺកូវីដ១៩ បានកើនដល់ជាង១០០លានករណីនៅទូទាំងសាកលលោក ខណៈប្រទេសនានាព្យាយាមដោះស្រាយបញ្ហាការខ្វះខាតវ៉ាក់សាំង។ លោក Biden ថា សហរដ្ឋអាមេរិកទិញវ៉ាក់សាំងបង្ការកូវីដ១៩ ជាង២រយលានដូសទៀត។ លោក Biden និងលោក Putin ពិភាក្សាតាមទូរស័ព្ទលើកទី១។ ការកាត់ទោសចោទប្រកាន់លោក Trump នឹងដំណើរការ បើទោះបីមានការជំទាស់យ៉ាងខ្លាំងពីគណបក្សសាធារណរដ្ឋក៏ដោយ។ សីតុណ្ហភាពសាកលកើនឡើងជាងមុន ដោយបង្កើនល្បឿនការប្រែប្រួលអាកាសធាតុ និងព័ត៌មានផ្សេងៗទៀត៕
