កម្មវិធីវិទ្យុ
ព័ត៌មានពេលព្រឹក៖ ១៣ មករា ២០២១
ព័ត៌មានអំពីកម្ពុជាមានដូចជា តុលាការភ្នំពេញថាសវនាការលោក កឹម សុខា មិនមែនជាអាទិភាព ដោយសារលោកនៅក្រៅឃុំ។ ចំណែកឯព័ត៌មានអន្តរជាតិវិញមានដូចជា រដ្ឋមន្ត្រីការបរទេសអាមេរិកលោក Pompeo បំពេញទស្សនកិច្ចនៅការិយាល័យ VOA និងបានសរសើរ VOA។ ប្រទេសចិននាំមុខគេក្នុងការគាបសង្កត់ប្រព័ន្ធផ្សព្វផ្សាយនៅឆ្នាំ២០២០។ ប្រទេសចិនថា អ្នកវិទ្យាសាស្រ្តរបស់អង្គការសុខភាពពិភពលោក (WHO) នឹងចាប់ផ្តើមការស៊ើបអង្កេតពីប្រភពដើមនៃជំងឺកូវីដ១៩។ លោក Trump ថាលោក «មិនចង់បានអំពើហិង្សានោះទេ» ពេលដែលការប្តឹងដកលោកពីតំណែងខិតជិតមកដល់។ ប្រទេសថៃទទួលសំណើពីក្រុមហ៊ុនឱសថ AstraZeneca និង Sinovac ឲ្យចុះបញ្ជីប្រើប្រាស់វ៉ាក់សាំងក្នុងប្រទេសខ្លួន។ ទីផ្សារជំនួញភាគហ៊ុនអឺរ៉ុបឈានដល់ចំណុចច្របូកច្របល់នៅថ្ងៃអង្គារ។ និយ័តករក្នុងប្រទេសអ៊ូហ្គាន់ដា បញ្ជាឲ្យបិទប្រព័ន្ធបណ្តាញសង្គម មុនថ្ងៃបោះឆ្នោត។ ឧទ្ធម្ភាគចក្រយោធាប្រទេសស៊ូដង់ខាងត្បូងធ្លាក់បណ្តាលឲ្យអ្នកដំណើរ១១នាក់រងរបួស៕
ព័ត៌មានពេលរាត្រី៖ ១៣ មករា ២០២១
ព័ត៌មានអំពីកម្ពុជាមានដូចជា អាជ្ញាធរថា ផ្តាសាយបក្សី(H5N1)នៅខេត្តបាត់ដំបងសង្ស័យឆ្លងពីសត្វស្លាបងាប់នៅកន្លែងចិញ្ចឹមមាន់ទា។ តុលាការឲ្យស៊ើបអង្កេតបន្ថែមក្នុងករណីបាក់រលំអគារក្នុងខេត្តកែប ដែលសម្លាប់មនុស្ស៣៦នាក់កាលពីឆ្នាំមុន។ អ្នកនយោបាយប្រឆាំងតស៊ូការទូតដើម្បីបង្កើតបក្សឡើងវិញ តែនៅមិនទាន់មានភាពប្រាកដនិយម។ ពលករខ្មែរ៦នាក់ទៀតដែលត្រឡប់មកពីថៃវិញ ឆ្លងជំងឺកូវីដ១៩។ ព័ត៌មានអន្តរជាតិមានដូចជា មន្ត្រីឥណ្ឌូណេស៊ីរកឃើញប្រអប់ខ្មៅរបស់យន្តហោះដែលធ្លាក់កាលពីថ្ងៃសៅរ៍។ ឥណ្ឌូណេស៊ី បានចាប់ផ្តើមយុទ្ធនាការចាក់វ៉ាក់សាំងនៅពេលដែលការស្លាប់ដោយជំងឺកូវីដ១៩កើនដល់កម្រិតមិនធ្លាប់មាន។ សមាជិកសភាមួយចំនួនតូចខាងគណបក្សសាធារណរដ្ឋថា ពួកគេ នឹងបោះឆ្នោតប្តឹងទម្លាក់លោកTrump ចេញពីតំណែង។ ក្រសួងការបរទេសអាមេរិកលុបចោលដំណើរទស្សនកិច្ចរបស់ប្រេសិតអង្គការសហប្រជាជាតិទៅកាន់កោះតៃវ៉ាន់។ សហរដ្ឋអាមេរិកព្រមានថាអ៊ីរ៉ង់កំពុងជំរុញលទ្ធភាពនៃការកកើតឡើងវិញក្រុមអាល់កៃដា។ រដ្ឋអាជ្ញាអាមេរិក កំណត់អត្តសញ្ញាណកុបករជាង១៧០នាក់ដែលវាយសង្គ្រប់វិមានសភាដែលអាចជាប់បទចោទប្រកាន់ព្រហ្មទណ្ឌ។ សហរដ្ឋអាមេរិកផ្លាស់ប្តូរយុទ្ធសាស្ត្រចាក់វ៉ាក់សាំងកូវីដ១៩ និងព័ត៌មានអន្តរជាតិសំខាន់ៗមួយចំនួនទៀត៕
