កម្មវិធីវិទ្យុ
ព័ត៌មានពេលព្រឹក៖ ១៤ មករា ២០២១
ព័ត៌មានអំពីកម្ពុជាមានដូចជា តុលាការកាត់ទោសប៉េអឹម២នាក់ឲ្យជាប់ពន្ធនាគារ៤ឆ្នាំនិង៧ឆ្នាំ រឿងវាយដំអ្នកជាប់ឃុំរហូតដល់ស្លាប់។ តុលាការឲ្យស៊ើបអង្កេតបន្ថែមក្នុងករណីបាក់រលំអគារក្នុងខេត្តកែប ដែលសម្លាប់មនុស្ស៣៦នាក់កាលពីឆ្នាំមុន។ ចំណែកឯព័ត៌មានអន្តរជាតិវិញមានដូចជា បេក្ខនារីប្រធានាធិបតីតែម្នាក់គត់របស់ប្រទេសអ៊ូហ្គាន់ដា និយាយថា គួរផ្លាស់ប្តូរភាពដឹកនាំ។ រដ្ឋអាជ្ញាអាមេរិក រំពឹងថានឹងចោទប្រកាន់ក្រុមកុបករនៅវិមានសភារាប់រយនាក់។ កម្មវិធីលើកកម្ពស់ស្រ្តីពិភពលោករបស់អ្នកស្រី Ivanka Trump សម្រេចបានពាក់កណ្តាលគោលដៅ។ លោក Biden តែងតាំងអ្នកស្រី Samantha Power អតីតបេសកជនប្រចាំអង្គការសហប្រជាជាតិ ឲ្យដឹកនាំទីភ្នាក់ងារផ្តល់ជំនួយរបស់អាមេរិក។ ប្រទេសចិនរកឃើញកំណើនអ្នកឆ្លងជំងឺកូវីដ១៩ថ្មី ខ្ពស់បំផុតក្នុងមួយថ្ងៃ ចាប់តាំងពីខែកក្កដាមក។ យន្តហោះចម្បាំងអ៊ីស្រាអែល វាយប្រហារផ្នែកខាងកើតប្រទេសស៊ីរី។ គណបក្សកុម្មុយនីស្តឡាវ បើកមហាសន្និបាតជ្រើសរើសថ្នាក់ដឹកនាំ ស្របពេលខ្លួនកំពុងមានបញ្ហាសេដ្ឋកិច្ច៕
ព័ត៌មានពេលរាត្រី៖ ១៤ មករា ២០២១
ព័ត៌មានអំពីកម្ពុជាមានដូចជា គម្រប់ខួបកាន់អំណាច៣៦ឆ្នាំ លោក ហ៊ុន សែន សំឡឹង«ជម្រើសច្រកចេញ»។ ក្នុងសវនាការសំណុំរឿង«ក្បត់ជាតិ» សកម្មជនបក្សប្រឆាំងត្រូវសួរនាំអំពី«សន្ដិភាព»និង«ហ្វេសប៊ុក»។ នៅក្នុងកម្មវិធី Hello VOA ថ្ងៃនេះ មានកិច្ចពិភាក្សាអំពី «ការគ្រប់គ្រងចំណូលប្រេងដោយតម្លាភាពនៅកម្ពុជា»។ ព័ត៌មានអន្តរជាតិវិញមានដូចជា រដ្ឋមន្ត្រីការបរទេសអាមេរិកជំរុញឲ្យបន្តគោលនយោបាយរបស់លោក Trump ចំពោះប្រទេសចិន។ រដ្ឋសភាអាមេរិក ប្តឹងទម្លាក់លោក Trump ចេញពីតំណែងពីបទញុះញង់ឲ្យមានកុបកម្មនៅវិមានសភា។ ប៉ូលិសក្រុងហុងកុង ចាប់ខ្លួនមនុស្ស១១នាក់ដែលបានជួយពួកសកម្មជនគាំទ្រលទ្ធិប្រជាធិបតេយ្យឲ្យគេចខ្លួន។ ក្រុមអ្នកស្រាវជ្រាវប្រចាំអង្គការសុខភាពពិភពលោកបានទៅដល់ទីក្រុងវូហានប្រទេសចិន ដើម្បីស៊ើបអង្កេតប្រភពនៃជំងឺកូវីដ១៩។ រដ្ឋធានីវ៉ាស៊ីនតោនបង្កើនការការពារសន្តិសុខ មុនពិធីស្បថចូលកាន់តំណែងប្រធានាធិបតីថ្មីចូលមកដល់។ កំពុងតក់ស្លុតនឹងជំងឺកូវីដ១៩ ស្រាប់តែកសិករចិញ្ចឹមបក្សីនៅអាស៊ីប្រយុទ្ធនឹងការផ្ទុះឡើងនៃជំងឺផ្ដាសាយបក្សី និងព័ត៌មានផ្សេងៗទៀត៕
